உங்களுக்குத் தெரியுமா ?
வேரித்தாஸ் நிகழ்ச்சிகளை டிஜிட்டல் தொழில் நுட்பத்தில் 24 மணிநேரமும், 7 நாட்களிலும் இணையத்தளத்திலும் அன்ராய்டு மொபைலிலும் கேட்கலாம். அன்ராய்டு மொபைல் பயன்பாட்டினைப் பதிவிறக்கம் செய்ய RVA MOBILEஎன டைப் செய்யவும்

உலக செய்திகள்

தமிழகத்தில் 86 லட்சத்து 17 ஆயிரம் புதிய மின்னணு அட்டைகள் வழங்கப்பட்டன
தமிழகத்தில் புழக்கத்தில் உள்ள குடும்ப அட்டைகளுக்கு பதிலாக இதுவரை, 86 லட்சத்து 17 ஆயிரம் புதிய மின்னணு அட்டைகள் வழங்கப்பட்டுள்ளன என்று அமைச்சர் காமராஜ் தெரிவித்தார். இன்று சென்னை, எழும்பூரில் பொது விநியோகத் திட்ட முழு கணினி மயமாக்கல் மற்றும் மின்னணு அட்டைகள் வழங்கல் ஆகியவற்றின் முன்னேற்றம் குறித்த ஆய்வுக் கூட்டம், உணவு மற்றும் நுகர்பொருள் வழங்கல் துறை அமைச்சர் காமராஜ் தலைமையில் நடைபெற்றது. கூட்டுறவுத் துறை அமைச்சர் செல்லூர் கே.ராஜூ முன்னிலை வகித்தார். இக்கூட்டத்திற்குசென்னை, காஞ்சிபுரம், திருவள்ளூர், திருவண்ணாமலை, வேலூர், விழுப்புரம் மற்றும் கடலூர் மாவட்டங்களை சேர்ந்த உணவுப்பொருள் வழங்கல் மற்றும் நுகர்வோர் பாதுகாப்புத் துறை துணை ஆணையாளர்கள், உதவி ஆணையாளர்கள், மாவட்ட வழங்கல் அலுவலர்கள், வட்ட வழங்கல் அலுவலர்கள், தமிழ்நாடு நுகர்பொருள் வாணிபக் கழக பொது மேலாளர்கள், மண்டல மேலாளர்கள், கூட்டுறவுத் துறை இணைப் பதிவாளர்கள், துணைப் பதிவாளர்கள் மற்றும் துறை அலுவலர்கள் பங்கேற்றனர். இது தொடர்பாக தமிழக அரசு இன்று வெளியிட்ட செய்திக்குறிப்பில், 'பொது விநியோகத் திட்ட கணினி மயமாக்கல் தொடர்பாக அலுவலர்கள் பயன்படுத்தக்கூடிய G2G, MIS மற்றும் பொதுமக்கள் பயன்படுத்தக் கூடிய tnpds ஆகிய வலைதளங்களை பயன்படுத்தி பொதுமக்களுக்கு மின்னணு குடும்ப அட்டைகளை விரைவில் வழங்கிட எடுக்கப்பட வேண்டிய நடவடிக்கைகள் குறித்து ஆலோசனை வழங்கப்பட்டது. குடும்ப அட்டைதாரர்கள் தங்களுக்கான மின்னணு அட்டைகள் பெற்றபின் அதில் மாற்றங்கள்தேவைப்படின், கைப்பேசி செயலி, பொதுமக்களுக்கான வலைதளம் (tnpds.gov.in) மற்றும் உதவிஆணையாளர்கள் / வட்ட வழங்கல் அலுவலகங்களில் செய்து கொள்ளலாம். தேவைக்கேற்ப மாற்றம் செய்த பின் புதிய மின்னணு அட்டையை அரசு இ-சேவை மையங்கள் மூலம் பெற்றுக் கொள்ளலாம் என அமைச்சர் காமராஜ் தெரிவித்தார். தமிழகத்தில் புழக்கத்தில் உள்ள குடும்ப அட்டைகளுக்கு பதிலாக இதுவரை, 86 லட்சத்து 17 ஆயிரம் புதிய மின்னணு அட்டைகள் வழங்கப்பட்டுள்ளன. மீதமுள்ள மின்னணு அட்டைகளை வழங்கும் பணி விரைந்து நடைபெற்று வருகிறது. மொத்தமுள்ள 1 கோடியே 90 லட்சத்து 80 ஆயிரத்து 693 குடும்ப அட்டைகளில், 1 கோடியே 37 லட்சத்து34 ஆயிரத்து 615 அட்டைகளுக்கு ஆதார் அட்டை விவரங்கள் முழுவதுமாகவும், 51 லட்சத்து 59 ஆயிரத்து 482 அட்டைகளுக்கு பகுதியாகவும் பதிவு செய்யப்பட்டுள்ளது. மீதமுள்ள 1 லட்சத்து 96 ஆயிரத்து 596 அட்டைகளுக்குஆதார் அட்டை விவரங்கள் பதிவு செய்யப்பட வேண்டியுள்ளது என அமைச்சர் காமராஜ் கூறினார்' என தெரிவிக்கப்பட்டுள்ளது.
See More
மகாராஷ்டிரா முதல்வர் சென்ற ஹெலிகாப்டர் விபத்து: அவசரமாக தரையிறக்கியதால் தப்பினார்
மகாராஷ்டிரா முதல்வர் சென்ற ஹெலிகாப்டரில் தொழில்நுட்பக் கோளாறு ஏற்பட்டதால் ஹெலிகாப்டர் விபத்துக்குள்ளானது. இந்த விபத்தில் முதல்வர் தேவேந்திர பட்நவிஸ் அதிர்ஷ்டவசமாக உயிர் பிழைத்தார். இது தொடர்பாக அவர் தனது ட்விட்டர் பக்கத்தில், "லட்டூர் பகுதியில் நான் சென்ற ஹெலிகாப்டர் விபத்துக்குள்ளானது. பயப்படத் தேவையில்லை. நானும் என்னுடன் பயணித்தவர்களும் பத்திரமாகவே உள்ளோம்" எனக் குறிப்பிட்டிருந்தார். இந்த விபத்து குறித்து விமான போக்குவரத்து இயக்குநரகத்தின் மூத்த அதிகாரி ஒருவர் கூறும்போது, "ஹெலிகாப்டர் விபத்துக்குள்ளானது. விபத்தில் ஹெலிகாப்டருக்கு குறிப்பிடத்தக்க சேதம் ஏற்பட்டுள்ளது" என்றார். ஹெலிகாப்டர் விபத்து குறித்து பல்வேறு தகவல்களும் பரவிவந்த நிலையில், "ஹெலிகாப்டர் சிறு விபத்துக்குள்ளானது. நான் பத்திரமாக உள்ளேன். வதந்திகளை நம்ப வேண்டாம். விபத்தில் பைலட்டுக்கு சிறிய காயம் ஏற்பட்டது. மற்றவர்கள் நலமுடன் இருக்கிறோம். 11 கோடி மகாராஷ்டிரா மக்களின் ஆசிர்வாதமே இதற்குக் காரணம். நான் பயணித்த ஹெலிகாப்டர் புதிதாக வாங்கப்பட்டது. புதிய ஹெலிகாப்டரில் தொழில்நுட்பக் கோளாறு ஏற்பட்டது தொடர்பாக போலீஸ் அறிக்கை கோரவுள்ளோம்" என செய்தியாளர்களிடம் கூறினார். அண்மையில் காட்சிரோலி செல்வதற்காக பட்நவிஸ் இதே ஹெலிகாப்டரைப் பயன்படுத்தினார். அப்போதும் தொழில்நுட்பக் கோளாறு ஏற்பட்டது. இதனையடுத்து தனது பயணத்தை சாலை வழியாக பட்நவிஸ் தொடர்ந்தார் என்பது குறிப்பிடத்தக்கது.
See More
மான்செஸ்டர் தாக்குதல்: தீவிரவாதியின் குடும்பம் தொடர்பாக வெளியான தகவல்
பிரித்தானியாவில் மனித வெடிகுண்டு தாக்குதல் நடத்திய தீவிரவாதியின் குடும்ப உறுப்பினர் அனைவருக்கும் சர்வதேச தீவிரவாத அமைப்புகளுடன் தொடர்பு உள்ளதாக அதிர்ச்சி தகவல் வெளியாகியுள்ளது. மான்செஸ்டர் நகரில் கடந்த திங்கள் அன்று Salman Abedi என்ற தீவிரவாதி நடத்திய மனித வெடிகுண்டு தாக்குதலில் 22 பேர் கொல்லப்பட்டனர். இது தொடர்பாக பொலிசார் 9 பேர் வரை கைது செய்துள்ளனர். இவர்களில் தீவிரவாதியின் உறவினரும் அடங்குவர். பிரித்தானிய நாட்டை உலுக்கிய இத்தாக்குதல் தொடர்பாக பொலிசார் விசாரணை நடத்தியபோது தீவிரவாதியின் குடும்பம் தொடர்பாக பல அதிர்ச்சி தகவல்கள் வெளியாகியுள்ளன. தாக்குதல் நடத்திய தீவிரவாதி லிபியாவில் ஐ.எஸ் தீவிரவாதிகளுடன் பயிற்சி பெற்றவன் எனவும், பாரீஸ் மற்றும் பிரஸ்சல்ஸ் நகரில் நிகழ்ந்த தாக்குதலுக்கும் இவனுக்கும் தொடர்பு இருக்கலாம் என பொலிசார் சந்தேகம் அடைந்துள்ளனர். மேலும், தீவிரவாதியின் சகோதரரான Hashem என்பவனுக்கு மான்செஸ்டர் தாக்குதல் தொடர்பாக ஒரு மாதத்திற்கு முன்பே தெரியும் எனவும் பொலிசார் சந்தேகம் எழுப்பி இவனையும் கைது செய்துள்ளனர். இதுமட்டுமில்லாமல், தாக்குதல் நடத்திய தீவிரவாதியின் தந்தையான Ramadan(51) என்பவர் அல்-கொய்தா தீவிரவாத அமைப்புடன் தொடர்பில் இருப்பவர் எனவும், இந்த அமைப்பிற்கு ஆதரவாக அவர் பல்வேறு பிரச்சாரங்களை மேற்கொண்டு வந்துள்ளார் எனவும் பொலிசாருக்கு தெரியவந்துள்ளது. இத்தகவலை தொடர்ந்து தீவிரவாதியின் தந்தையும் லிலியாவில் நேற்று இரவு கைது செய்யப்பட்டுள்ளார். ஆனால், தன்னுடைய மகன் அப்பாவி எனவும், இந்த தற்கொலை படை தாக்குதலுக்கும் அவனுக்கும் எவ்வித தொடர்பும் இல்லை என ரமதான் கூறி வருவது குறிப்பிடத்தக்கது.
See More
தீவிரவாத தாக்குதலுக்கு திட்டமிட்ட நண்பர்களை தீர்த்து கட்டிய இஸ்லாமிய மாணவன்
அமெரிக்காவில் தீவிரவாத தாக்குதல் நடத்த திட்டமிட்டு வந்த சக நண்பர்களை உடன் தங்கியிருந்த இஸ்லாமிய மாணவன் சுட்டுக்கொன்றுள்ளார். புளோரிடா மாகாணத்திலேயே இச்சம்பவம் நடந்துள்ளது. நண்பர்களை சுட்டுக்கொன்ற 18 வயதான டேவன் ஆர்த்ர்ஸ் பொலிசில் தானாக சரணடைந்துள்ளார். பொலிசார் நடத்திய விசாரணையின் போது, தன் அறையில் தங்கியிருந்த நண்பர்கள் தீவிரவாத தாக்குதலுக்கு திட்டமிட்டு வந்ததாகவும், அவர்களை தான் சுட்டுக்கொன்று விட்டதாகவும் அதிர்ச்சி தகவல் அளித்துள்ளார் ஆர்த்ர்ஸ். ஆர்த்ர்ஸூடன் அவரது அறைக்கு சென்ற பொலிசார், இரண்டு உடல்களை கைப்பற்றியுள்ளனர். மேலும், அந்த அறையில் நடத்திய சோதனையில் தாக்குதலுக்காக இருந்த வெடிப்பொருட்களை பறிமுதல் செய்துள்ளனர். கொல்லப்பட்டவர்கள் Jeremy Himmelman(வயது 22) மற்றும் Andrew Oneschuk (வயது 18) என தெரியவந்துள்ளது. மேலும், இவர்களுடன் தங்கி தாக்குதலுக்கு திட்டம் தீட்டி வந்த முக்கிய குற்றவாளியான Brandon Russell என்ற நபரை பொலிசார் கைது செய்துள்ளனர். இவர்கள் மூவரும் Neo-Nazi அமைப்பை சேர்ந்தவர்கள் என தெரியவந்துள்ளது. அமெரிக்காவை பழிதீர்க்கும் நோக்கில் அவர்கள் தாக்குதலுக்கு திட்டமிட்டு வந்ததும் விசாரணையில் தெரியவந்துள்ளது.
See More
நடுக்கடலில் கவிழ்ந்த அகதிகள் படகு: 30 பேர் பரிதாபமாக பலி
லிபியாவில் இருந்து இத்தாலிக்கு 700 பேரை ஏற்றிக்கொண்டு சென்ற படகு அதிக பாரம் தாங்காமல் நடுக்கடலில் கவிழ்ந்ததில் 30 பேர் பலியாகியுள்ளனர். ஆப்பிரிக்கா மற்றும் மத்திய கிழக்கு நாடுகளிலிருந்து வறுமை மற்றும் போர் காரணமாக அங்குள்ள மக்கள் உலகின் பல்வேறு நாடுகளுக்கு புலம்பெயர்ந்து வருகிறார்கள். கடல் வழியில் ஆபத்தான பயணத்தையே இவர்கள் அதிகம் மேற்கொண்டு வருகிறார்கள். இதனால் பல அசம்பாவித சம்பவங்கள் நடப்பது தொடர்கதையாகி வருகிறது. இந்நிலையில், லிபியாவிலிருந்து இத்தாலிக்கு 700 அகதிகளை ஏற்றிக்கொண்டு படகு சென்று கொண்டிருந்தது. நடுக்கடலில் போய் கொண்டிருந்த போது அதிக பாரம் காரணமாக படகு ஒரு பக்கமாக சாய்ந்து விபத்துக்குள்ளானது, இதில் 200 பேர் வரை கடலில் விழுந்தனர். இதையடுத்து அங்கு விரைந்த கடற்படையினர் கடலில் விழுந்தவர்களை மீட்கும் பணியை மேற்கொண்டனர். இந்த விபத்தில் 30க்கும் மேற்பட்டோர் உயிரிழந்துள்ளதாக தெரியவந்துள்ளது. இந்த ஆண்டு மட்டும் பல்வேறு இடங்களில் தோராயமாக 1,300 அகதிகள் கடலில் விழுந்து உயிரிழந்துள்ளது குறிப்பிடத்தக்கது.
See More
பிரதமர் நரேந்திர மோடியை டெல்லியில் சந்தித்த தமிழக முதல்வர்
பிரதமர் நரேந்திர மோடியை இன்று (புதன்கிழமை) டெல்லியில் சந்தித்த தமிழக முதல்வர் எடப்பாடி பழனிசாமி, தமிழகத்தின் முக்கியமான பிரச்னைகளில் மத்திய அரசின் தலையீட்டை கோரும் மனு ஒன்றை அளித்துள்ளார். பிரதமரிடம் தமிழக முதல்வர் அளித்துள்ள மனுவில் இடம்பெற்றுள்ள கோரிக்கைகள்(சுருக்கமாக) 1. நீட் தேர்வு மசோதாவுக்கு ஒப்புதல் நீட் தேர்விலிருந்து தமிழகத்திற்கு விலக்கு அளிக்கும் தமிழக அரசின் சட்ட மசோதாவிற்கு குடியரசு தலைவர் ஒப்புதல் பெற்று தர பிரதமர் நடவடிக்கை எடுக்க வேண்டும் என வலியுறுத்தல் 2. தமிழகத்திற்கு எய்ம்ஸ் மருத்துவமனை தமிழகத்திற்கு உயர்தர மருத்துவ சிகிச்சை கிடைக்க எய்ம்ஸ் மருத்துவமனையை தமிழகத்தின் முக்கிய பகுதி ஏதேனும் ஒன்றில் விரைவில் தொடங்க வேண்டும் என்று கோரிக்கை 3. விவசாய இழப்பீடும், பயிர் காப்பீட்டுத் தொகையும் மத்திய அரசின் இழப்பீட்டிற்கான பங்கான 168.66 கோடி ரூபாயினை விடுவித்து, இந்திய வேளாண் காப்பீட்டு நிறுவனம், விரைவில் தமிழ்நாட்டின் பாதிக்கப்பட்ட விவசாயிகளுக்கு இழப்பீட்டு தொகைகளை முழுமையாக வழங்குவதற்குத் துணைபுரிய வேண்டும் என மத்திய அரசிடம் வலியுறுத்தல் தமிழ்நாட்டைச் சேர்ந்த விவசாயிகள், ஏற்கெனவே 2016-17 ஆம் ஆண்டில்நிலவிய கடும் வறட்சியால் ஏற்பட்ட பயிர் சேதம் குறித்த துயரத்தில் இருக்கின்றனர். இந்த நிலையில் காப்பீட்டு நிறுவனங்கள் இழப்பீட்டு தொகையை வழங்குவதில் காலதாமதம் செய்கின்றனர்.இது விவசாயிகளின் துயரத்தை அதிகரிக்கச் செய்கிறது. இதனால் இழப்பீட்டுத் தொகை பெறுவது மேலும் தாமதமாகாமல் தமிழ்நாட்டில் பிரதமரின் பயிர் காப்பீட்டு திட்டத்தைச் செயல்படுத்தும் அதிகாரமளிக்கப்பட்ட அனைத்துக் காப்பீட்டு நிறுவனங்களுக்கும் விரைந்து காப்பீட்டு நிதியை வழங்க அறிவுறுத்திடுமாறு கோரிக்கை. 4. காவிரி படுகை மேம்பாட்டுத் திட்டத்திற்கு ஒப்புதல் காவிரி ஆற்றின் வடிநிலங்களில் நீர்ப்பாசன ஏற்பாட்டு முறைகளை மேம்படுத்துதல் மற்றும் புத்துயிரூட்டலுக்கான தமிழக அரசின் திட்டத்தை தேசியத் திட்டமாக அறிவிக்க சம்பந்தப்பட்ட அமைச்சகத்திற்கு பிரதமர் அறிவுறுத்தல் வழங்க வேண்டும் என்று கோரிக்கை. 5. பவானிக்கு குறுக்கே அணையை தடுக்க வேண்டும் கேரள அரசு பவானி ஆற்றின் குறுக்கே கட்டும் அணைகள்/தடுப்பணைகள் ஏற்கனவே கட்டி முடிக்கப்பட்ட அல்லது கட்டுமானத்திலுள்ள அல்லது கட்டுவதற்குக் கருதப்பட்டுள்ள திட்டப் பணிகள் குறித்து அனைத்து விவரங்களையும் அளித்திட கேரள அரசை அறிவுறுத்த வேண்டும் என பிரதமரிடம் கோரிக்கை. காவிரி மேலாண்மை வாரியம் அமைக்கப்பட்டுச் செயல்பாட்டிற்கு வரும்வரை, எவ்விதக் கட்டுமான நடவடிக்கைகளையும் கேரள அரசு மேற்கொள்ளக்கூடாது என அறிவுறுத்த வேண்டுமெனவும் வேண்டுகோள் 6. பம்பாறு இணைப்பு திட்டம் தீபகற்ப ஆறுகளை இணைத்தல் திட்டத்தின் கீழ் பம்பை - அச்சன் கோவில் – வைப்பாறு நதிகளை இணைத்து இரண்டு மாநிலங்களுக்கும் பலன் தரும் என்றபோதிலும், தற்போது விரிவான திட்ட அறிக்கை ஒன்றினை உருவாக்குவதற்கு ஒப்புதல் அளிக்கத் தயங்குகிறது. எனவே, நாட்டின் நலன் கருதி ஒப்புதல் அளிக்கக் கேரள அரசை வலியுறுத்துமாறு பிரதமருக்கு கோரிக்கை 7. குடிமராமத்து திட்டத்திற்கு மத்திய அரசின் ஆதரவு தமிழகத்தில் ஏற்பட்டுள்ள வறட்சியை போக்கி வறட்சியற்ற மாநிலமாக மாற்றப் பல்வேறு பணிகளை மேற்கொள்ள வேண்டியிருப்பதால், தமிழ் நாட்டிலுள்ள பாரம்பரிய நீர்நிலைகளை அதிகளவில் மீட்டெடுக்க உதவுகிற வகையில் 2017-2018 ஆம் ஆண்டில் தமிழக அரசின் நிதியளிப்பான 300 கோடி ரூபாயுடன், மத்திய அரசும் 500 கோடி ரூபாய் நிதியுதவி அளிக்க வேண்டுகோள். 8. தமிழ்நாட்டிற்கு நிலுவையிலுள்ள மானியங்களை விரைந்து வழங்க வேண்டும் தமிழகத்திற்கான 16,959.04 கோடி ரூபாய் (இணைப்பு) தொகைக்கான நிலுவையினங்களைக் கொண்ட திருத்தியமைக்கப்பட்ட பட்டியல் ஒன்று பிரதமரிடம் அளிக்கப்பட்டுள்ளது. அதன்படி இத்தொகையின் பெரும்பகுதியினை முன்னதாகவே விடுவிப்பதற்கு பிரதமர் ஆவன செய்யும்படி கோரிக்கை 9. தமிழக மீனவர்கள் மற்றும் படகுகளை விடுவிக்க வேண்டும் இலங்கை படையினரால் பிடித்து வைக்கப்பட்டுள்ள இந்திய மீனவர்களுக்குச் சொந்தமான 135 படகுகளை விடுவித்து, இலங்கை கடற்படையால் கைது செய்யப்பட்டுள்ள 11 இந்திய மீனவர்களை விடுவிக்க நடவடிக்கை எடுக்க வேண்டும். தமிழ்நாட்டிலிருந்து இந்திய மீனவர்கள் பாக் விரிகுடா பகுதியில் மீன் பிடிப்பதற்கான பாரம்பரிய உரிமையைப் பாதுகாப்பதற்கு அனைத்து முய
See More
பிரித்தானியாவில் மீண்டும் தீவிரவாத தாக்குதல்: பிரதமர் தெரெசா மேவின் எச்சரிக்கை
பிரிட்டனின் மான்செஸ்டர் தாக்குதல் போன்று மற்றொரு தாக்குதல் நடத்தப்படலாம் என பிரதமர் தெரெசா மே எச்சரிக்கை விடுத்துள்ளார். பிரிட்டனின் மான்செஸ்டர் நகரில் கடந்த திங்கட்கிழமை இரவு நடத்தப்பட்ட தாக்குதலில் 22 பேர் பலியாகினர், 120 பேர் படுகாயமடைந்தனர். இந்த தாக்குதலுக்கு ஐஎஸ் அமைப்பு பொறுப்பேற்றுக் கொண்டுள்ளது. இதனை தொடர்ந்து நாட்டின் பாதுகாப்பு நிலை குறித்து பிரதமர் தலைமையில் அவரச கூட்டம் நடைபெற்றது. இதன்பின்னர் பேட்டியளித்த பிரதமர் தெரெசா மே, தற்போது நடத்தப்பட்ட தாக்குதல் போன்று மற்றொரு தாக்குதல் நடத்தப்படலாம். நாட்டிற்கு அச்சுறுத்தல் அதிகமாகி இருப்பதால் மக்கள் கவனமாக இருக்க வேண்டும். பிரிட்டனின் முக்கிய இடங்களில் பொலிசுக்கு பதிலாக இராணுவ வீரர்கள் பாதுகாப்பு பணியில் செயல்படுங்கள் என உத்தரவிட்டுள்ளார்.
See More
பாரீஸில் மீண்டும் பயங்கரம்: 5 மில்லியன் யூரோ மதிப்புள்ள நகைகள் கொள்ளை
பிரான்ஸ் நாட்டில் உள்ள நகை கடை ஒன்றில் ஆயுதம் ஏந்திய கொள்ளையர்கள் மூவர் 5 மில்லியன் யூரோ மதிப்புள்ள நகைகளை கொள்ளையிட்டுள்ள சம்பவம் அதிர்ச்சியை ஏற்படுத்தியுள்ளது. பிரான்ஸ் நாட்டின் தலைநகரான பாரீஸில் அமைந்துள்ள rue de la Paix என்ற நகை கடையில் தான் இந்த துணிகர சம்பவம் நிகழ்ந்துள்ளது. நேற்று பிற்பகல் நேரத்தில் கடையின் முன்பாக வாடிக்கையாளர் தோற்றம் கொண்ட நபர் ஒருவர் நின்றுள்ளார். இந்நபரை பார்த்த காவலாளி கதவை திறந்து விட முயன்றபோது மறைந்திருந்த மற்ற இருவரும் திடீரென கடைக்குள் புகுந்துள்ளனர். உள்ளே நுழைந்ததும் துப்பாக்கி மற்றும் கோடாரியை காட்டி பிற வாடிக்கையாளர்களை அப்புறப்படுத்தியுள்ளனர். பின்னர், கடை ஊழியர்களை மிரட்டிய மூவரும் கண்ணாடி கூண்டுகளை உடைத்து அங்கு வைக்கப்பட்டிருந்த நகைகளை அள்ளி மூட்டியாக கட்டிக்கொண்டு காரில் தப்பியுள்ளனர். கொள்ளை சம்பவம் நிகழ்ந்தபோது கடையின் உரிமையாளர் மற்றும் அவருடைய பிள்ளைகள் இருவர் கடையிலேயே இருந்துள்ளனர். இச்சம்பவம் குறித்து பொலிசாரிடம் புகார் செய்யப்பட்டதும், கடையில் வைக்கப்பட்டிருந்த கண்காணிப்பு கமெரா மூலம் ஆதாரங்களை திரட்டியுள்ளனர். கொள்ளைப்போன நகைகளின் மதிப்பு சுமார் 5 மில்லியன் யூரோ என உரிமையாளர் புகார் அளித்துள்ளார். பாரீஸ் மாநகரில் தொடர்ந்து கொள்ளை சம்பவம் நிகழ்ந்து வருவதால் பொதுமக்களும் அந்நாட்டிற்கு சுற்றுலா வரும் வெளிநாட்டினர்களும் அச்சத்தில் மூழ்கியுள்ளனர் என்பது குறிப்பிடத்தக்கது.
See More
குண்டுவெடிப்பில் உயிருக்கு போராடியவர்களை காப்பாற்றிய பிச்சைக்காரர்
பிரித்தானிய நாட்டில் வெடிகுண்டு தாக்குதலில் உயிருக்கு போராடியவர்களை காப்பாற்றிய பிச்சைக்காரர் ஒருவரின் துணிச்சலை பாராட்டி பொதுமக்கள் நிதியை வாரி வழங்கி வருகின்றனர். மான்செஸ்டர் மைதானத்தில் கடந்த திங்கள் கிழமை இரவு நிகழ்ந்த இசை நிகழ்ச்சி ஒன்றில் வெடிகுண்டு தாக்குதல் நடத்தப்பட்டதில் 22 பேர் கொல்லப்பட்டனர். 59 பேர் தற்போது மருத்துவமனையில் சிகிச்சை பெற்று வருகின்றனர். நாட்டை உலுக்கிய இத்தாக்குதலுக்கு ஐ.எஸ் அமைப்பு பொறுப்பேற்றுள்ளது. இந்நிலையில், வெடிகுண்டு தாக்குதல் நிகழ்ந்த பின்னர் உயிருக்கு போராடிய நபர்களை காப்பாற்றிய பிச்சைக்காரர் ஒருவருக்கு பாராட்டுக்குள் குவிந்து வருகின்றன. தாக்குதல் நிகழ்வதற்கு முன்னர் கிரைஸ் பார்க்கர்(33) என்ற அந்த நபர் மைதானத்திற்கு வெளியே நின்றுக்கொண்டு நபர்களிடம் உணவு, பணம் கேட்டுக்கொண்டு இருந்துள்ளார். அப்போது, திடீரென பலத்த ஓசையுடன் வெடிகுண்டு தாக்குதல் நிகழ்ந்துள்ளது. இத்தாக்குதலின் விளைவாக கிரைஸ் பார்க்கர் அதிர்ச்சியில் கீழே விழுந்துள்ளார். ஆனால், சில வினாடிகளில் சுதாரித்துக்கொண்ட அவர் தாக்குதல் நிகழ்ந்த இடத்தை நோக்கி ஓடியுள்ளார். பின்னர், அங்கு உயிருக்கு போராடிய கால்களை இழந்த சிறுமி ஒருவரை காப்பாற்றி வெளியே தூக்கிச்சென்றுள்ளார். இதனை தொடர்ந்து உயிரை இழக்கும் தருணத்தில் இருந்த பெண் ஒருவரை தனது கைகளால் தாங்கி பிடித்து ஆறுதல் கூறியுள்ளார். ஆனால், அப்பெண் இறுதியில் உயிரை விட்டுள்ளார். இச்சம்பவத்திற்கு பின்னரும், தாக்குதல் நடந்த இடத்தில் இருந்து பலரையும் கிரைஸ் பார்க்கர் காப்பாற்றி வெளியே அழைத்து வந்துள்ளார். கிரைஸ் பார்க்கரின் இத்துணிச்சலை பாராட்டி பொதுமக்கள் அவருக்கு சுமார் 4,000 பவுண்ட் வரை நிதி வசூல் செய்து கொடுத்துள்ளனர். மேலும், கிரைஸ் பார்க்கரின் செயலை பாராட்டி ‘மனிதத்தன்மை உங்களை போன்றவர்களிடம் இன்னும் இருக்கிறது’ என புகழ்ந்து வருகின்றனர்.
See More
தீவிரவாதிகளின் கோழைத்தனமான செயல்: பிரித்தானிய தாக்குதலுக்கு கண்டனம்
பிரித்தானியாவில் நடைபெற்ற தீவிரவாத தாக்குதலுக்கு பிரதமர் மோடி தனது டுவிட்டர் பக்கத்தில் கண்டனம் தெரிவித்துள்ளார். மான்செஸ்டர் நகரில் தீவிரவாதிகள் நடத்திய தற்கொலைப்படை தாக்குதலில் 19 பேர் உயிரிழந்துள்ளனர், 59 பேர் காயம் அடைந்துள்ளனர். இதுகுறித்து தனது டுவிட்டர் பக்கத்தில் மோடி வெளியிட்டுள்ள இரங்கல் செய்தியில், தீவிரவாதிகளின் இந்த கோழைத்தனமான செயல் கண்டிக்கத்தக்கது என அவர் குறிப்பிட்டுள்ள பிரதமர் மோடி, தாக்குதலில் உறவுகளை இழந்து வாடும் குடும்பத்தினருக்கு ஆழ்ந்த இரங்கலை தெரிவித்துக் கொள்வதாக கூறியுள்ளார். படுகாயமடைந்தவர்கள் விரைவில் குணமடைய வேண்டும் என பிரார்த்திப்பதாகவும் தனது ட்விட்டர் பதிவில் மோடி குறிப்பிட்டுள்ளார்.
See More